အိမ်ရောင်းမထွက်လို့ စိတ်ညစ်နေရင် ဒါကို အရင်ဖတ်ကြည့်ပါ

အခုတလော Online မှာ "ဘာလို့ အိမ်ရောင်းမထွက်တာလဲ" ဆိုပြီး ရှာဖွေသူတွေ အရင်ကထက် ပိုများလာပါတယ်။ တကယ်လို့ ကိုယ့်အိမ်က ဈေးကွက်တင်ထားတာ ကြာပြီဖြစ်ပေမဲ့ အဝယ်လိုက်မလာဘူးဆိုရင် စိတ်မပူပါနဲ့။ ကိုယ်တစ်ယောက်တည်း ဒီလိုဖြစ်နေတာ မဟုတ်ပါဘူး။

တကယ့်‌စျေးကွက်ထဲမှာ အိမ်တွေက နေ့တိုင်း အရောင်းအဝယ် ဖြစ်နေတာကြောင့် နည်းလမ်းလေးတွေ အနည်းငယ် ပြောင်းလဲကြည့်ဖို့ပဲ လိုပါတယ်။ အဖြေကို Online မှာ လျှောက်ရှာမယ့်အစား ကိုယ့်ရဲ့ Agent နဲ့ သေချာတိုင်ပင်ကြည့်တာက ပိုထိရောက်ပါတယ်။ အိမ်ရောင်းမထွက်ရတဲ့ အဓိက အကြောင်းရင်း (၃) ချက်ကို ကြည့်လိုက်ရအောင်။

၁။ အိမ်ရဲ့ အပြင်အဆင် (Presentation)

အရင်နှစ်တွေတုန်းက အိမ်ရှားပါးခဲ့တာကြောင့် ဝယ်သူတွေက အိမ်ရဲ့ အပြစ်အနာအဆာတွေကို သိပ်မကြည့်ဘဲ ဝယ်ခဲ့ကြပါတယ်။ ဒါပေမဲ့ အခုတော့ မတူတော့ပါဘူး။ ဝယ်သူတွေက ဖုန်းထဲကနေ အိမ်ပုံတွေကို တစ်ခုနဲ့တစ်ခု ယှဉ်ကြည့်ပြီးမှ ရွေးချယ်ကြတာပါ။ အိမ်က ဟောင်းနွမ်းနေတာ ဒါမှမဟုတ် ပစ္စည်းတွေ ရှုပ်ပွနေရင် ဝယ်သူက စာရင်းထဲကနေ ချက်ချင်းပယ်လိုက်ပါလိမ့်မယ်။

ဒါကြောင့် အိမ်ထဲက မလိုအပ်တဲ့ ပစ္စည်းအပိုတွေကို ဖယ်ရှားပြီး ရှင်းလင်းနေအောင် အရင်လုပ်ပါ။ နံရံဆေးသုတ်တာနဲ့ မီးသီးအသစ်လဲတာမျိုး အကုန်အကျနည်းတဲ့ ပြုပြင်မှုတွေလုပ်ပြီးမှ အလင်းရောင်ကောင်းကောင်းနဲ့ ဓာတ်ပုံရိုက်ပြီး ကြော်ငြာပါ။

၂။ ဈေးနှုန်း (Pricing)

ဒါကတော့ လက်ခံရခက်ပေမဲ့ အမှန်တရားပါပဲ။ လွန်ခဲ့တဲ့ နှစ်အနည်းငယ်က ကိုယ့်အိမ်နီးချင်း ရောင်းရတဲ့ဈေးကို ကြည့်ပြီး ဈေးခေါ်လို့ မရတော့ပါဘူး။ အခုခေတ် ဝယ်သူတွေက သူတို့ရဲ့

ဘတ်ဂျက်နဲ့ ကိုက်မကိုက်ကို သေချာတွက်ချက်ကြပါတယ်။ ဈေးကွက်ပေါက်ဈေးထက် ပိုခေါ်ထားရင် ဝယ်သူတွေက Online မှာ ကြည့်ရုံပဲ ကြည့်ပြီး ဝယ်ဖို့ ကမ်းလှမ်းမှာ မဟုတ်ပါဘူး။

ဒါကြောင့်လက်ရှိ ဈေးကွက်ထဲမှာ တကယ် အရောင်းအဝယ်ဖြစ်နေတဲ့ ပေါက်ဈေးကို အကျိုးဆောင်တွေဆီမှာ သေချာစုံစမ်းပါ။ ဝယ်သူ စိတ်ဝင်စားလာအောင် ဆွဲဆောင်မှုရှိတဲ့ (Competitive Price) တစ်ခုကို သတ်မှတ်ပြီး ဈေးညှိနှိုင်းနိုင်ကြောင်း (Negotiable) ကိုလည်း ဖော်ပြပေးပါ။

၃။ အိမ်ကြည့်ရလွယ်ကူမှု (Access)

အိမ်ဝယ်မယ့်သူက အိမ်ကို လာကြည့်လို့မရရင် ဝယ်မှာမဟုတ်ပါဘူး။ ဥပမာ- "ညနေမှ ကြည့်ရမယ်"၊ "စနေ၊ တနင်္ဂနွေ မရဘူး" ဆိုတဲ့ ကန့်သတ်ချက်တွေက ဝယ်သူတွေကို စိတ်ပျက်စေပါတယ်။ ဝယ်သူမှာ ရွေးချယ်စရာတွေ အများကြီးရှိနေတဲ့အတွက် ကိုယ့်အိမ်ကို ကြည့်ရခက်နေရင် သူတို့က တခြားအိမ်ကိုပဲ သွားကြည့်ပါလိမ့်မယ်။

ဒါကြောင့် အိမ်ကြည့်သူလာမယ့်အချိန်ကို အတတ်နိုင်ဆုံး လိုက်လျောညီထွေဖြစ်အောင် စီစဉ်ပေးပါ။ အကယ်၍ ကိုယ်တိုင်မအားပါက ယုံကြည်ရတဲ့ အကျိုးဆောင်ကို သော့အပ်ထားပြီး ဝယ်သူ အဆင်ပြေတဲ့အချိန်တိုင်း ကြည့်ရှုနိုင်အောင် စီစဉ်ထားပါ။

Online မှာ ရှာမယ့်အစား ဒါကို လုပ်ကြည့်ပါ

ကိုယ့်အိမ် ဘာလို့ ရောင်းမထွက်တာလဲဆိုပြီး Online မှာ အဖြေရှာမယ့်အစား ကိုယ့်ရဲ့ Agent ကို ဒီမေးခွန်း (၃) ခု မေးကြည့်ပါ။

၁။ အခုခေတ် ဝယ်သူတွေက ဘယ်လိုအိမ်မျိုးကို ရှာနေကြတာလဲ?

၂။ လာကြည့်တဲ့သူတွေဆီက ဘယ်လို Feedback တွေ ရလဲ?

၃။ ကိုယ့်အိမ်က အခုထိ ဘာလို့ ရောင်းမထွက်သေးတာလဲ?

ဒီစကားဝိုင်းကနေ ကိုယ်ဘာတွေ ပြင်ဆင်ရမလဲဆိုတာ ပိုပြီး ရှင်းရှင်းလင်းလင်း သိလာပါလိမ့်မယ်။

အနှစ်ချုပ်ပြောရရင် အိမ်ရောင်းမထွက်တာက အိမ်ရောင်းလို့မရတော့ဘူးလို့ ဆိုလိုတာမဟုတ်ပါဘူး။ ဈေးကွက်က ကိုယ့်ကို အချက်ပြနေတာပါ။ ကိုယ်ငှားထားတဲ့ Real Estate Agent နဲ့ သေချာတိုင်ပင်ပြီး လိုအပ်တာလေးတွေ အနည်းငယ် ပြင်ဆင်လိုက်တာနဲ့ အခြေအနေတွေ ပြောင်းလဲသွားနိုင်ပါတယ်။